毛線記者陳嘉銘報道
睇到篇幾搞笑ge文
http://hk.news.yahoo.com/article/080920/4/8bm3.html 毛線記者陳嘉銘報道 (明報)3月8日 星期日 05:05 【明報專訊】 「陳嘉銘，你過到關呀？」 「係呀，陳錦霞，我過關好順利。而澳門海關檢查證件嘅時候，仲認得我係毛線記者，提醒我要記得做番符合身分嘅嘢；佢嘅講法，令到我本來打算只係嚟旅遊，都刻意要聯絡直播室進行採訪。」 「咁你係唔係應該從事番旅客嘅活動呢？」 「冇錯呀，所以一到步之後，我就望吓山，望吓海，話晒係澳門旅行，都有紅男綠女，聯歡嬉戲，仲去大三巴、觀音像、媽閣廟，景緻真係優美。之後去咀香園買手信，包澳門一定歡喜。」 「而家好似有人過唔倒關，又點解呢？」 「為咗推動澳門旅遊業，過關政策收緊，係言之成理。好似法律學者要嚟澳門講學，來回船票校到啱啱好三個小時來回，咀香園都去唔倒，係破壞旅遊消費；南華早報記者過關顧住望實長毛，連大三巴都唔望一眼，係唔尊重古蹟。所以澳門政府為咗對旅遊及歷史表示尊重，會拒絕呢啲人入境；以後要入境工作，一定係因為旅遊而順道做嘢，至少要望吓大三巴。」 「如果真係咁啱要去澳門，又唔肯定會唔會被拒，可以點算？」 「政府建議，香港市民可以申請移民過去，因為移民政策比過關政策寬鬆；而且澳門政府對公民好好，上年泰國政變，澳門即時派飛機接載公民，令香港人好妒忌，一早想移民過去。唔少香港煙民仲話，澳門煙仔特別平，一包唔駛十蚊，亦想移民過去，一邊居住一邊食煙，唔駛好似而家咁買澳門私煙要驚畀警察拉。唯一嘅問題係，移民申請批核之後，係屬於『非旅遊』，又過唔倒關，唔知點過去；總理溫家寶為咗呢個矛盾，會舉行一次港澳會議，地點唔會喺澳門，因為佢唔係去旅行，會被拒入境。」 文 陳嘉銘 |
